Новости

О! Освященная главо Николае, иже имыи апостальская дарования, покажи ныне и на нас, нищих и смиренных рабех твоих, свое отеческое благоутробие. Отжени от нас вся вещи неприязненны, и всякие прилоги страстей, и соблюди своея паствы, еже есть верных сочетание: вся, иже во власти сущия и все христолюбивое воинство, освещенныи чин, и вся люди верныя, еже на пажити благочестивых недр, злачного твоего соблюдения, да питаеми будем всегда , и светлостьми облистаем твоего заступления, невреждени пребудем, в тишине же и в любви и во смирении поживем честно, еже и святое блаженьство твое, присно величающее, ублажим же и прославим, сице рцем : блажим тя Мире, иже Ликийския страны граде, яко такова пастыря и великомудра учителя получил еси, яко Христова непреборима воина, иже еретическия полки Божиим словом всесильным, яко копием остротою разума прободая, и вся тех лестныя козни низлагая. Блажим блаженного, иже родившего тя, и воспитавшего, яко велик дар Богови принесе, воистину паче всякого всеплодия; не токмо же Ликийстей стране ты еси, Николае, но и всей вселенней предивное удобрение, велик бо еси в чудесех, еже и святым священнейшее радование. Тем и ныне верни, сошедшееся во святую Церковь, молим тя и вопием: О! отче святыи Николае, призри люди верныя, и направи нас мольбами твоими, еже избавитися бесовского навета. И благоприятным Богови быти, благодатию Того и человеколюбием, Искупльшаго нас честною животворящею из ребр истекшею Кровию, Христа Бога нашего, Ему же подобает всяка слава, честь и держава и великолепие, со Отцем и со Святым Духом, ныне и присно и во веки веком. Аминь. (поклон земной).